Lebenslauf - Engelbert Agethle

Am 30.11.1941 isch inser Tataals erstes Kind von dr Marianne Agethle in Tscherms geboren. 
Seine Kindheit hot er in Schleis mit seiner Mama, sein Stieftata Ignaz und seine Briader Karl und Luis verbrocht.
In der Zeit hot er viel scheans drlebund a viele Lumpereien drstellt.
Gern hot er olm drzeilt, wiasie firn Learer um Holz gongen sein, ba die Madlen gfensterlet hobm, odr wia sie ba zwoaNochbarinen, dia it garasou auskemen sein, die Bloamen austauscht hobm und nu viele weitere sette Gschichtlen. 
Noch dr Pflichtschual hot dr Tata in Zillertol a Lear zun Senn gmocht. 
Als Senn worer af viele verschiedene Olmen, und hot nor Ounfong die 60er Johr af dr Matscher Olm seine zukünftige Frau kennenglernt. 
In 5. Oktober 1968 hot er seine Christine af Schleis keiretet. Weil sui beade int Schweiz gorbetet hobm, hobm sie sich sem nor a Drhoam gschoffn und in August 1969 isch die Tochter die Daniela gebourn.
Kurze Zeit spater hot s Schicksol zuagschlogn: drei Tog noch dr Geburt isch suina erster Sohn, dr Günther, gstorbm. 
1973 isch nor die zweite Tochter, die Erika, gebourn.
Mitte die 70er Johr hot sein Bruader Luis in sein Noumen a Hittl af Gums ersteigert, deiser und seine Freunde mit viel Liebe und Aufwond hergrichtet hobm.
In Dezember 1980 isch er mit seiner Familie noch Gums zouchn und hot seine Orbet ban Donatsch als Schlosser gegn seiner nuien Orbet in dr Hoppe intauscht, wou er bis zu seiner Pensionierung bliebm isch.
Durch seiner offenen und liabm Ort hot er in seiner nuien Heimat schnell Freunde gfuntn und as nuigierige Nochbern sein schnell amol hilfsbereite, guate Komerodn gwordn.
Obwoul die Familienplanung ogschlossn wor, isch dr Engl 1983 mit 41 Johr numol Tata gwordn und sein Bua, dr Kurt isch gebourn. 
Nebm seiner Familie wor in Engl die Komerodschoft wichtig, deswegn wor er ba viele veschiedene Vereine tätig.
Schun in dr Schweiz wor er ba die Samariter und als groaßer Gustav Thöni Fan a ban semen Club drbei.
Als aufrichtiger Tiroler isch er nor schnell amol dr Schützenkompanie Prod beitreten.
Vrzua und vrzua ischer zu ollaweil mea Vereine gongen, wia zum Beispiel zun KVW, Frontkämpfer, Schworzes Kreizund nu viele ondre. 
Noch dr Restaurierung fa dr Gumser Kirch hot er die Mesnerei ibernumen.
Dia Leidenschoft hot er mit vollen Insotz und groaßer Freid 35 Johr long gleb und sou mancher fa ins frog sich, wia oft er eper in der Kirch aufanied grennt isch. 
2009 hot ihm s Lond Tirol die Landesverdienstmedaille fir sein ehrenomtlichtn Insotz verliehen.
Earsch sem isch ins bewusst gwordn, in wiaviele verschiedene Vereine, Organisationen und Komitees ertätig wor und ban zomzeiln hoter selber gmiast schmunzeln, dassmr auf iber 20 Stuck kemmen sein. 
Und wer in Engl kennt hot woas, holbe Sochen sein it in Frog kemmen desholb wor er ba viele ferderführend an vorderster Front drbei.
Trotz seiner gonzn Vereine isch die Familie fir ihm olm an erster Stell gstondn und er hot olm fir ins Zeit gfuntn. 
Umsou mea hoter sich gfreit als er 1991 zum erstn mol stolzer Opa gwordn isch. 
Neben seine fünf Enkel hot er bis zum Schluss a nu terft Uropa fa seine zwoa Spitzbuabm wearn. 
Bsundersch gfreit hoter sich a olm afn 4e Bier, um mit seine Kollegn zomsitzn zu kennen.
In die lestn Johre hot inser Tata efters mit verschiedene Kronkaten kämpfen gmiast. 
Durch seine Lebensfreid und sein Kompfgeist hoter sich obr olm wieder aufdrrofft, biser huier in Mai seine schlimme Diagnose kriag hot.
Noch an longen Kronkenhausaufentholt wor sein greaster Wunsch wieder hoam zu kemen, um seine leste Zeit im Kreise seiner Familie zu verbringen.
Leider isch dia Zeit viel zu schnell vergongen und in lestn Sunnta hot inser Tata in Kompf gegen seine Kronket verlourn und die Augen fir olm verschlossn.
Dr Tata hot olm gearn drzeilt, und i glab wenni do sou oi schaug sitzen so einige dia a Gschichtl fan Engl drzeiln kanntn und mit ihm oanegschrieben hoben.
Dr Tata wor weit iber die Londesgrenzen ausi bekonnt, die Partnerschoft mitn Londkreis Neu-Ulm und driber hinaus isch ihm olm sehr am Herzen glegen, umso scheaner wenn ihm heint, viele fa dia Komeroden afn lesten Weg begleiten.
Wenn mr afn Leben fa insern Tata zruggschaugn nor kenn mr mit Stolz und Iberzeigung sogn, dass mr in bestn Monn, Tata, Opa und Uropa kop hobm.

Zum Obschluss torf i mi nu bedonkn, ba olle dia in Tata in die lesten Mounate Wochen und Toge af irgend einer Weise kolfn und unterstützt hoben, bei den Diensthabenden Ärzten, den Ärzten und dem Pflegepersonal der Abteilung HNO Meran, der Paliativabteilung von Martinsbrunn, und dem gesamten Team vom Haus und Pflegedienst des Sprengel Obervinschgau dia sich so liebevoll um ihm kümmert hoben.
Dass dr Tata gonz ah bsunderer Mensch wor beweists eis heint do olle, souviele Leit hoben sich ba ins gmeldet.
Vergelt's Gott fir oll die scheanen, tröstenden, herzlichen Worte, fir jedes Händeschüttel, jede Umormung, fir die Gebete und jeden guaten Gedonken. 

Donkschean sou unkompliziert sou hilfsbereit wia olle worn, donkschean ban Herrn Pforrer ba die Vorbeter, Mesner, bar musikalischen Umrahmung, ba olle Vereine und Freunde.

Es isch wundrschean ah Toal fa sou ah groasser Gemeinschoft zusein, versuachmer gemeinsom Tog fir Tog liebevoll und respektvoll mitanonder umzugean, ins Zeit nemmen fir an kurzen Gespräch, ah liebevolle Umormung oder ah herzliches Lächeln, Zeit nemmen fir unsre Mitmenschen.

Iglab sel tat in Tata an meisten freien.

Fürbitten - Engelbert Agethle

- Vater im Himmel. Inser Opa Engl hot a groaßes Herz kop und wor fir viele Leit a Vorbild. Weit ibrn Dorf hinaus wor er aktiv, seis ba die Schitzn, Mesner, Frontkämpfer, KVW und vieln mea. Belohne insern Tata fir sein unermüdlichen Einsotz und hilf ins, seine Werte zu holtn und weiter zu gebm. Wir bitten dich erhöre uns!
- Liaber Opa. Die Familie wor fir diar olm s Wichtigste. Zomsitzn ba an Glasl Wein, epes guats Essn und iber olte Zeitn reidn. Gern hobmr diar ba deine vielen Gschichtlen zuagloust und viel fa diar lernen kennt.
Guter Gott, Vergilt insern liabn Opa oll des Guate, wos er fir seiner Familie toun hot: seine bedingungslose Liebe, sein Verständnis, sein offenes Ohr und seine grenzenlose Hilfsbereitschoft. Wir bitten dich erhöre uns!
- Unser Opa war stets ein Kämpfer. Auf die Frage „Wia geaz dr?“ antwortete er meist mit einem „Eijo geat schun“. Nie hat er sich über sein Leiden beschwert und war bis zum Schluss voller Hoffnung.
Gutter Gott. Schenke auch anderen Kranken die Kraft, ihr Schicksal zu tragen und gib ihnen die Zuversicht auf Genesung. Wir bitten dich erhöre uns!
- Großer Gott. Dr Opa hot zlest an schwarn Weg kop. Viele guate Menschen hobm ihm drbei begleitet. Vergilt ihnen, wos sie ihm Guats toun hobm und gib ins olle in Zukunft die Kroft, ondern Menschen in Not beizustean. Wir bitten dich erhöre uns!
- Guter Vater. In seiner schweren Krankheit hat unser Opa viel gekämpft, aber auch viel Kraft erfahren und Zuversicht ausgestrahlt. Wir danken dir für alles, was wir in dieser schweren Zeit an Liebe schenken und erfahren durften und bitten dich: bewahre all diese Erinnerungen in unseren Herzen. Wir bitten dich erhöre uns!
- Herr unser Gott, schenke allen, die unseren lieben Engl vorausgegangen sind die ewige Ruhe bei dir. Wir bitten dich erhöre uns!